शिवसेना सामाजिक न्याय विभागात लक्ष्मण वाघमारे यांची उपाध्यक्षपदी नियुक्ती मराठवाडा कार्यक्षेत्राची जबाबदारी ; सामाजिक न्याय चळवळीला बळ

केज/प्रतिनिधी

शिवसेना पक्षप्रमुख तथा महाराष्ट्र राज्याचे उप मुख्यमंत्री एकनाथराव शिंदे यांच्या नेतृत्वाखाली सामाजिक न्यायाच्या चळवळीला अधिक प्रभावी करण्याच्या दृष्टीने शिवसेना सामाजिक न्याय विभागाने महत्त्वाचा निर्णय घेतला आहे. शिवसेना सामाजिक न्याय विभागाचे महाराष्ट्र राज्याध्यक्ष तथा आमदार श्री.राम पंडागळे यांनी श्री.लक्ष्मण म.वाघमारे यांची उपाध्यक्ष महाराष्ट्र राज्य या पदावर एक वर्षाच्या कालावधीसाठी नियुक्ती जाहीर केली आहे.

या नियुक्तीपत्रावर दिनांक २२ जानेवारी २०२६ असा आहे. वाघमारे यांच्याकडे मराठवाडा विभागाचे कार्यक्षेत्र सोपवण्यात आले आहे.शिवसेना सामाजिक न्याय विभागाचे मुख्य उद्दिष्ट समाजातील गरजू,वंचित, दिव्यांग,ज्येष्ठ नागरिक तसेच दुर्बल घटकांना वेळेवर मदत,न्याय व मार्गदर्शन मिळवून देणे हे आहे.या उद्दिष्टांच्या पूर्तते साठी लक्ष्मण वाघमारे यांनी प्रामाणिकपणे, निष्ठेने व जबाबदारीने कार्य करावे,अशी अपेक्षा नियुक्तीपत्राद्वारे व्यक्त करण्यात आली आहे.

मराठवाडा हा सामाजिक, शैक्षणिक व आर्थिकदृष्ट्या अनेक आव्हानांना सामोरे जाणारा विभाग आहे. अशा परिस्थितीत सामाजिक न्याय विभागाचे उपाध्यक्ष म्हणून लक्ष्मण वाघमारे यांची भूमिका महत्त्वपूर्ण ठरणार आहे.जनतेशी थेट संवाद साधून त्यांच्या अडचणी समजून घेणे, शासनाच्या योजना तळागाळात पोहोचवणे, तसेच अन्यायग्रस्त घटकांना न्याय मिळवून देण्यासाठी संघटनात्मक पातळीवर सक्रिय काम करणे,अशी जबाबदारी त्यांच्यावर असेल.

या नियुक्तीमुळे मराठवाड्यात शिवसेनेच्या सामाजिक न्याय विभागाचे कार्य अधिक गतिमान होईल, असा विश्वास पक्ष नेतृत्वाने व्यक्त केला आहे.संघटन मजबूत करण्यासोबतच सामाजिक प्रश्नांवर ठाम भूमिका घेऊन वाघमारे यांचे कार्य विभागाला नवी दिशा देईल,अशी अपेक्षा शिवसैनिक व पदाधिकाऱ्यां मधून व्यक्त होत आहे.आमदार राम पंडागळे यांनी नियुक्ती पत्रात नमूद केले आहे की,लक्ष्मण वाघमारे यांच्या कार्यामुळे शिवसेनेचा सामाजिक न्याय विभाग अधिक सक्षम व प्रभावी बनेल. सामाजिक बांधिलकी जपत, सर्वसामान्यांच्या प्रश्नांसाठी रस्त्यावर उतरून संघर्ष करण्याची परंपरा शिवसेनेची असून, वाघमारे ही परंपरा पुढे नेतील,असा विश्वास व्यक्त करण्यात आला आहे.

या नियुक्तीबद्दल मराठवाडा विभागातील शिवसैनिक, सामाजिक कार्यकर्ते व विविध स्तरा तून लक्ष्मण वाघमारे यांच्यावर अभिनंदनाचा वर्षाव होत असून,त्यांच्या माध्यमातून सामाजिक न्यायाच्या लढ्याला अधिक बळ मिळेल,अशी अपेक्षा व्यक्त केली जात आहे.