केज/प्रतिनिधी
प्रेम,जिव्हाळा आणि संरक्षणाच्या वचनाचा पवित्र सण ‘रक्षाबंधन’ आज राज्यात उत्साहात साजरा करण्यात आला या सणाची मुळे प्राचीन कथांमध्ये आढळतात. महाभारतातील कथा सर्वाधिक प्रसिद्ध आहे. जेव्हा द्रौपदीने श्रीकृष्णाच्या जखमी हाताला आपल्या साडीचा तुकडा फाडून बांधला,तेव्हा कृष्णाने तिला सदैव संरक्षण देण्याची शपथ घेतली. त्याचप्रमाणे, ऐतिहासिक काळात मेवाडची राणी कर्णावतीने गुजरातच्या बादशहा हुमायूँला राखी पाठवून मदतीची विनंती केली होती, आणि हुमायूँने आपले साम्राज्य सोडून तिच्या रक्षणासाठी धाव घेतली होती.
आजही ही परंपरा भावंडांमधील प्रेम, विश्वास आणि रक्षणाचे प्रतीक म्हणून जपली जाते.बहिणीने आपल्या भावाच्या मनगटावर राखी बांधून त्याच्या दीर्घायुष्याची व सुख समृद्धीची प्रार्थना केली, तर भावाने बहिणीचे आयुष्यभर रक्षण करण्याची शपथ घेतली.
सकाळपासूनच बाजारपेठांमध्ये राख्या, गोडधोड व भेटवस्तू खरेदीसाठी गर्दी पाहायला मिळाली. पारंपरिक पद्धतीने पूजा करून राखी बांधल्यानंतर भावंडांनी एकमेकांना मिठाई भरवून सणाचा आनंद लुटला.काही ठिकाणी लहान मुलांनी व ज्येष्ठांनीही हा सण साजरा करून कुटुंबातील एकात्मतेचा संदेश दिला.
या निमित्ताने अनेक सामाजिक संस्थांनी अनाथालये व वृद्धाश्रमात जाऊन रहिवाशांच्या मनगटावर राखी बांधून त्यांना कुटुंबाचा उबदारपणा जाणवून दिला.तसेच, पोलिस,सैनिक व आरोग्य सेवकांना राखी बांधून त्यांच्या सेवेला सलाम करण्यात आला.राज्यातील विविध भागांत हा सण आपापल्या पारंपरिक पद्धतीने आणि आनंदमय वातावरणात पार पडला.
