केज/प्रतिनिधी
केज तालुक्यातील मस्साजोग ग्रामपंचायती च्या सरपंचपदासाठी झालेल्या अत्यंत चुरशीच्या पोट निवडणुकीचा निकाल बुधवार दि.२९ एप्रिल रोजी जाहीर झाला. सर्वांचे लक्ष लागून असलेल्या या लढतीत दिवंगत माजी सरपंच संतोष देशमुख यांच्या पत्नी अश्विनी देशमुख यांना पराभवाचा धक्का बसला असून,त्यांचे प्रतिस्पर्धी स्वरूपानंद देशमुख यांनी ९२ मतांच्या फरकाने विजय संपादन केला आहे.
तणावपूर्ण वातावरणात मतमोजणी
माजी सरपंच संतोष देशमुख यांची डिसेंबर २०२४ मध्ये हत्या झाल्यापासून हे पद रिक्त होते.या पार्श्वभूमीवर अत्यंत तणावपूर्ण वातावरणात पार पडलेल्या मतदानानंतर आज केज तहसील कार्यालयात मतमोजणी प्रक्रिया पार पडली. एकूण तीन फेऱ्यांमध्ये ही मतमोजणी झाली. पहिल्या फेरीपासूनच स्वरूपानंद देशमुख यांनी वर्चस्व राखले होते.
पहिल्या फेरी दरम्यान स्वरूपानंद देशमुख यांची १५६ मतांची आघाडी घेतली होती.दुसऱ्या फेरी दरम्यान २० मतांची भर पडली.अंतिम निकालात एकूण ९२ मतांच्या फरकाने स्वरूपानंद देशमुख विजयी झाले.
सहानुभूतीची लाट ओसरली?
संतोष देशमुख यांच्या हत्येमुळे या निवडणुकी ला मोठी भावनिक किनार लाभली होती. अश्विनी देशमुख यांना सहानुभूतीच्या जोरावर विजय मिळेल,असा राजकीय विश्लेषकांचा अंदाज होता.मात्र, मतदारांनी स्वरूपानंद देशमुख यांच्या पारड्यात कौल दिल्याने राजकीय वर्तुळात आश्चर्य व्यक्त केले जात आहे.
आरोपांना मतपेटीतून उत्तर दिले अशी प्रतिक्रिया स्वरूपानंद देशमुख यांनी दिली.
विजयानंतर समर्थकांनी गुलाल उधळून जल्लोष साजरा केला.यावेळी माध्यमांशी बोलताना नवनिर्वाचित सरपंच स्वरूपानंद देशमुख म्हणाले की,हा विजय स्वाभिमानी मतदारांचा आणि गोरगरीब जनतेचा आहे.निवडणुकीदरम्यान माझ्यावर अनेक आरोप झाले,मात्र मतदारांनी मतपेटीतून त्याचं चोख उत्तर दिलं आहे.संतोष देशमुख यांना न्याय मिळवून देण्यासाठी मी आधीपासून प्रयत्नशील होतो आणि यापुढेही त्यांच्या न्यायाच्या लढाईत मी सदैव अग्रभागी राहीन असे त्यांनी सांगितले.या निकालामुळे केज तालुक्यातील राजकीय समीकरणे बदलण्याची शक्यता असून,आता नवनिर्वाचित सरपंचांच्या कार्यकाळाकडे सर्वांचे लक्ष लागले आहे.
