बीड/प्रतिनिधी
बीड जिल्ह्यात एक मोठी आणि खळबळजनक घटना समोर आली असून दिवंगत मसाजोग चे सरपंच संतोष देशमुख यांचे बंधू धनंजय देशमुख यांच्याविरोधात जीवे मारण्याचा प्रयत्न केल्याच्या आरोपावरून गुन्हा दाखल करण्यात आला आहे.या प्रकरणा मुळे जिल्ह्यात पुन्हा एकदा राजकीय आणि सामाजिक वर्तुळात चर्चांना उधाण आले आहे.मिळालेल्या माहितीनुसार,तक्रारदार समाधान खिंडकर यांनी दिलेल्या फिर्यादीवरून बीड शहर पोलीस ठाण्यात गुन्हा नोंद करण्यात आला आहे. फिर्यादीत नमूद केल्या प्रमाणे,बीड बायपास परिसरातील हॉटेल शेतकरी येथे ते जेवणा साठी गेले असताना ही घटना घडल्याचा दावा करण्यात आला आहे.
नेमके काय आहे प्रकरण?
फिर्यादी समाधान खिंडकर यांनी पोलिसांना दिलेल्या तक्रारीत म्हटले आहे की,ते हॉटेल शेतकरी येथे जेवण करत असताना धनंजय देशमुख तेथे आले. त्यानंतर त्यांच्यात काही कारणावरून वाद निर्माण झाला.या वादा दरम्यान धनंजय देशमुख यांनी आक्रमक भूमिका घेतल्याचा आरोप करण्यात आला आहे.
तक्रारीनुसार,धनंजय देशमुख यांच्यासोबत असलेल्या पोलीस अंगरक्षकाकडे असलेली पिस्तूल त्यांनी घेतली आणि ती थेट फिर्यादी च्या डोक्याला लावून जीवे मारण्याचा प्रयत्न केला.या घटनेमुळे परिसरात काही काळ तणावाचे वातावरण निर्माण झाल्याचे सांगितले जात आहे.
पोलिसांकडून गुन्हा दाखल
या प्रकरणी बीड शहर पोलीस ठाण्यात गुन्हा क्रमांक 192/2026 नोंद करण्यात आला आहे.पोलिसांनी भारतीय न्याय संहितेतील (BNS) विविध कलमांनुसार गुन्हा दाखल केला आहे.
नोंदविण्यात आलेल्या कलमांमध्ये कलम 109, 352, 351(2) आणि 3(5) यांचा समावेश आहे.फिर्यादीच्या तक्रारीची दखल घेत पोलिसांनी पुढील तपास सुरू केला असून घटनेचे सर्व पैलू तपासले जात असल्याची माहिती सूत्रां कडून मिळाली आहे.
जिल्ह्यात चर्चेला उधाण
दिवंगत सरपंच संतोष देशमुख यांच्या कुटुंबाचे नाव यापूर्वीही विविध कारणांनी चर्चेत राहिले आहे.अशा परिस्थितीत त्यांच्या बंधू विरोधात गुन्हा दाखल झाल्याची बातमी समोर आल्या नंतर जिल्हाभरात या घटनेची चर्चा सुरू झाली आहे.विशेष म्हणजे, तक्रारीत पोलीस अंगरक्षकाच्या शस्त्राचा वापर झाल्याचा गंभीर आरोप करण्यात आल्याने या प्रकरणाकडे अधिक गांभीर्याने पाहिले जात आहे.अंगरक्षका कडील शस्त्र संबंधित व्यक्तीच्या ताब्यात कसे गेले,तसेच घटनेच्या वेळी नेमकी परिस्थिती काय होती,याचा तपास पोलीस करत आहेत.
तपासावर सर्वांचे लक्ष
या प्रकरणातील आरोप अत्यंत गंभीर स्वरूपाचे असल्याने आता पोलिसांच्या तपासाकडे सर्वांचे लक्ष लागले आहे. सीसीटीव्ही फुटेज, प्रत्यक्षदर्शींचे जबाब आणि इतर पुरावे तपासून सत्य परिस्थिती समोर आणण्याचा प्रयत्न केला जात आहे.दरम्यान,या प्रकरणात अद्याप धनंजय देशमुख यांची अधिकृत भूमिका समोर आलेली नसून, पोलिसांकडून तपास पूर्ण झाल्यानंतरच संपूर्ण सत्य स्पष्ट होणार आहे.
महत्त्वाची नोंद
सदर वृत्त हे पोलिसांत दाखल करण्यात आलेल्या फिर्यादी आणि उपलब्ध प्राथमिक माहितीनुसार प्रकाशित करण्यात आले आहे. प्रकरणाचा तपास सुरू असून न्यायालयीन किंवा पोलीस तपासातून पुढे येणारी माहिती अंतिम मानली जाईल.
