केज/ प्रतिनिधी
जिल्हा परिषद प्राथमिक शाळा, साळेगाव (ता. केज) येथील मुख्याध्यापक आणि शिक्षक शाळेत वेळेवर उपस्थित राहत नसल्याचा खळबळजनक प्रकार उघडकीस आला आहे. या गंभीर प्रकरणाची दखल घेत वंचित बहुजन युवा आघाडीने मुख्य कार्यकारी अधिकाऱ्यांकडे (CEO) तक्रार करून दोषींवर कडक कारवाईची मागणी केली आहे.
नेमकी घटना काय?
मिळालेल्या माहितीनुसार, साळेगाव येथील जिल्हा परिषद शाळेत शिक्षक आणि मुख्याध्यापक नियमितपणे उपस्थित राहत नाहीत. ते शाळेत उशिरा येतात आणि अध्यापनाच्या कामात प्रचंड हलगर्जीपणा करतात, अशा तक्रारी ग्रामस्थांकडून केल्या जात होत्या. या पार्श्वभूमीवर, वंचित बहुजन युवा आघाडीचे जिल्हा सचिव लक्ष्मण शिवाजी ओव्हाळ यांनी दि. २३ फेब्रुवारी २०२६ रोजी सकाळी १०:१० वाजता शाळेला प्रत्यक्ष भेट दिली.
शाळेत शुकशुकाट, मोबाईलमध्ये शूटिंग
लक्ष्मण ओव्हाळ शाळेत पोहोचले असता, त्यांना धक्कादायक चित्र पाहायला मिळाले. सकाळी १०:१० वाजूनही शाळेत एकही शिक्षक किंवा खुद्द मुख्याध्यापक हजर नव्हते. या बेजबाबदारपणाचा पुरावा म्हणून ओव्हाळ यांनी तात्काळ आपल्या मोबाईलमध्ये व्हिडिओ शूटिंग केली आणि या प्रकरणाची माहिती फोनवरून मुख्य कार्यकारी अधिकारी व प्राथमिक शिक्षणाधिकाऱ्यांना दिली.
मुख्य मागण्या:
शाळेतील शिक्षकांच्या अनियमिततेची सखोल चौकशी व्हावी.
विद्यार्थ्यांच्या शैक्षणिक नुकसानीला जबाबदार असणाऱ्या मुख्याध्यापक व शिक्षकांवर कडक प्रशासकीय कारवाई करावी.
ग्रामीण भागातील विद्यार्थ्यांचे भविष्य घडवणाऱ्या जिल्हा परिषद शाळांमध्ये जर अशा प्रकारे शिक्षकांचा अभाव असेल, तर मुलांनी काय शिकावे? या प्रकरणाचा पाठपुरावा करून संबंधितांवर कारवाई होईपर्यंत आम्ही स्वस्थ बसणार नाही.”— लक्ष्मण शिवाजी ओव्हाळ (जिल्हा सचिव, वंचित बहुजन युवा आघाडी, बीड पूर्व)
आता या तक्रारीवर जिल्हा परिषद प्रशासन काय पावले उचलते, याकडे साळेगाव परिसरातील पालकांचे लक्ष लागले आहे.
