शिवजयंती २०२६ उत्सव शांततेत व सर्वसमावेशक साजरी करण्याचा संकल्प सहाय्यक पोलीस अधीक्षक वेंकटराम यांच्या प्रमुख उपस्थितीत केज येथे शांतता कमिटी बैठक संपन्न

केज/प्रतिनिधी

शिवजयंती उत्सव २०२६ हा शांततेत,शिस्तबद्ध व सामाजिक सलोख्याच्या वातावरणात साजरा व्हावा,या उद्देशाने केज पोलीस ठाणे येथे दि. ४ रोजी दुपारी १२ वाजता शांतता कमिटी बैठकीचे आयोजन करण्यात आले. सहाय्यक पोलीस अधीक्षक वेंकटराम यांच्या प्रमुख उपस्थितीत पार पडलेल्या या बैठकीत पोलीस प्रशासन,शिव जयंती उत्सव समित्या, सामाजिक कार्यकर्ते, पत्रकार बांधव व विविध शासकीय विभागांचे अधिकारी सहभागी झाले होते.

या बैठकीस केज पोलीस ठाण्याचे पोलीस निरीक्षक स्वप्निल उनवणे यांनी उपस्थितांना मार्गदर्शन करताना शिवजयंती उत्सव हा केवळ उत्सव न राहता सामाजिक ऐक्याचा आदर्श ठरावा,असे आवाहन केले.शहर व तालुक्यातील शिवजयंती उत्सव समित्यांचे अध्यक्ष, सचिव,पदाधिकारी, कार्यकर्ते,शिवप्रेमी तसेच पत्रकार बांधव मोठ्या संख्येने उपस्थित होते.

डीजे मुक्त शिवजयंती ,सांस्कृतिक कलेला प्राधान्य

बैठकीत सर्वानुमते एकमुखी निर्णय घेण्यात आला की,यंदाच्या शिव जयंती उत्सवात डीजे पूर्णतः बंद ठेवून पारंपरिक सांस्कृतिक कला पथकांना प्राधान्य दिले जाईल.यामुळे ध्वनी प्रदूषणावर नियंत्रण मिळेल तसेच शिव जयंती चा सांस्कृतिक व ऐतिहासिक संदेश प्रभावीपणे जनतेपर्यंत पोहोचेल,असा विश्वास उपस्थितांनी व्यक्त केला.

शहर स्वच्छता,अपूर्ण रस्ते व सुरक्षिततेवर भर

केज शहरातील एकूण परिस्थितीचा आढावा घेताना मिरवणुकीदरम्यान लाईट पोल,विद्युत वाहिन्या यामुळे उद्भवणारे धोके कमी करण्यासाठी विशेष उपाययोजना करण्यावर भर देण्यात आला.तसेच शहरातील अपूर्ण रस्ते व नाल्यांची कामे १५ फेब्रुवारीपूर्वी पूर्ण करावीत,याबाबत प्रशासनाने गांभीर्याने विचार करण्याची गरज असल्याचे मत व्यक्त झाले.

तरुणांचा सहभाग व महिलांसाठी स्वतंत्र व्यवस्था

पोलीस बंदोबस्ताच्या वेळी स्थानिक तरुणांनी पोलीस प्रशासनास सहकार्य करणे आवश्यक असल्याचे स्पष्ट करण्यात आले.त्याचबरोबर महिलां साठी स्वतंत्र व सुरक्षित व्यवस्था निर्माण करून, महिला,वृद्ध,लहान मुले व ग्रामीण भागातील नागरिक मोठ्या संख्येने उत्सवात सहभागी होतील,अशा सर्व समावेशक नियोजनावर बैठकीत विशेष भर देण्यात आला.

सामाजिक कार्यकर्त्यांचे मार्गदर्शन

यावेळी योगेश गायकवाड भाई मोहन गुंड,हनुमंत भोसले सर आदी सामाजिक कार्यकर्त्यांनी आपली मनोगते व्यक्त करत उत्सव अधिक शिस्तबद्ध,सुरक्षित व प्रेरणादायी कसा होईल, याबाबत मौलिक सूचना मांडल्या.

शांतता,समता व सुरक्षिततेचा संदेश

एकूणच, शिवजयंती उत्सव २०२६ हा शांतता, सामाजिक ऐक्य, पर्यावरण पूरक व सांस्कृतिक मूल्ये जपणारा ठरावा, यासाठी पोलीस प्रशासन व नागरिकांनी एकत्रितपणे जबाबदारी पारपाडण्याचा निर्धार या बैठकीत व्यक्त करण्यात आला.