केज शहरात समता सैनिक दलाचे प्रशिक्षण शिबिर व सैनिक नोंदणी अभियान उत्साहात संपन्न
केज/प्रतिनिधी
भारतीय बौद्ध महासभा, केज शहर शाखेच्यावतीने समता सैनिक दल अंतर्गत आयोजित करण्यात आलेले समता सैनिक प्रशिक्षण शिबिर व सैनिक नोंदणी अभियान केज शहरात उत्साहात पार पडले.हे शिबिर रविवार, दि.२१ डिसेंबर २०२५ रोजी नालंदा विद्यालय, फुलेनगर,केज येथे आयोजित करण्यात आले होते.
या प्रशिक्षण शिबिरात १०६ महिला,पुरुष व युवकांनी उत्स्फूर्तसहभाग नोंदवला.केज तालुक्यातील समता सैनिक दलातील समता सैनिक मोठ्या संख्येने उपस्थित होते.कार्यक्रमाचे वार्तांकन करण्यासाठी विविध माध्यमांचे पत्रकार बांधवही उपस्थित होते. शिबिरात अमरसिंह ढाका व कॅप्टन राजाभाऊ आठवले यांनी समता सैनिक प्रशिक्षक म्हणून उपस्थित राहून शिस्तबद्ध प्रशिक्षण दिले.
या कार्यक्रमाचे उद्घाटन ॲड.बाबासाहेब धन्वे, बीड जिल्हाध्यक्ष (पूर्व), भारतीय बौद्ध महासभा यांच्या हस्ते करण्यात आले.कार्यक्रमाच्या अध्यक्षस्थानी जयपाल मस्के,शहराध्यक्ष,भारतीय बौद्ध महासभा,केज हे होते.यावेळी उपस्थितां मध्ये तालुकाध्यक्ष बालासाहेब जोगदंड, महिला शाखा तालुकाध्यक्ष महानंदा गायकवाड,कार्यालयीन सचिव नंदकुमार मस्के तसेच समता सैनिक दलाचे आश्रुबा खरात, लिंबराज गायकवाड, मधुकर कदम व बळीराम सोनवणे,राजू घोडके, रणजित घाडगे, भैय्यासाहेब आरकडे,डॉ. प्रभाकर ठोके यांचा समावेश होता.
यावेळी मार्गदर्शन करताना उज्ज्वल, सुसंस्कृत व संघटित राष्ट्रनिर्मितीसाठी युवक-युवतींनी समता सैनिक दलात मोठ्या संख्येने सहभागी व्हावे, असे आवाहन करण्यात आले. प्रशिक्षण शिबिरा मध्ये शिस्त,संघटन, सामाजिक जाणीव, बौद्ध मूल्ये तसेच राष्ट्रहिताशी निगडित विविध विषयांवर सविस्तर मार्गदर्शन करण्यात आले.समता, स्वातंत्र्य,न्याय व बंधुता या तत्वांचा अंगीकार करून समाजात सकारात्मक परिवर्तन घडवण्याचे कार्य समता सैनिक दल करत असल्याचे मार्गदर्शकांनी नमूद केले.
या प्रशिक्षणा मुळे युवकांमध्ये सामाजिक बांधिलकी व संघटनात्मक जाणीव अधिक दृढ होईल,असा विश्वास व्यक्त करण्यात आला.कार्यक्रमाच्या यशस्वी आयोजनाबद्दल भारतीय बौद्ध महासभा, केज शहर शाखेचे पदाधिकारी व समता सैनिक दलातील कार्यकर्त्यांचे अभिनंदन करण्यात आले. कार्यक्रमाच्या शेवटी सहभागी समता सैनिक व उपस्थित मान्यवरांचे आभार मानण्यात आले.
