केज येथे न्यायालयीन इमारतीच्या दुसऱ्या मजल्याचा कोनशिला समारंभ उत्साहात संपन्न

केज/प्रतिनिधी

केज येथील अतिरिक्त जिल्हा व सत्र न्यायालय परिसरात नवीन न्यायालयीन इमारतीच्या दुसऱ्या मजल्याचा कोनशिला समारंभ रविवार,दि.२९ मार्च २०२६ रोजी सकाळी १०-३० वाजता उत्साहपूर्ण वातावरणात संपन्न झाला. न्यायव्यवस्थेच्या दृष्टीने महत्त्वपूर्ण ठरणाऱ्या या कार्यक्रमाला न्याय क्षेत्रातील अनेक मान्यवरांची उपस्थिती लाभली.

या कार्यक्रमाचे उद्घाटन मुंबई उच्च न्यायालयाचे माननीय न्यायमूर्ती श्री. किशोर चंद्रकांत संत व माननीय न्यायमूर्ती श्री. अभय ज.मंत्री यांच्या हस्ते करण्यात आले. तसेच मुंबई उच्च न्यायालयाचे न्यायमूर्ती माननीय श्री.सिद्धेश्वर सुंदरराव ठोंबरे यांची विशेष उपस्थिती लाभली.केज तालुक्याचे भूमिपुत्र असल्यामुळे त्यांचे विशेष स्वागत करण्यात आले.या

कार्यक्रमास राजस्थान उच्च न्यायालयाचे निवृत्त मुख्य न्यायमूर्ती तथा महाराष्ट्र राज्य स्थावर मालमत्ता नियामक मंडळ अध्यक्ष माननीय श्री.संभाजीराव शिवाजीराव शिंदे हे प्रमुख पाहुणे म्हणून उपस्थित होते. कार्यक्रमाचे अध्यक्षस्थान बीड येथील प्रमुख जिल्हा व सत्र न्यायाधीश माननीय श्री.आनंद लक्ष्मीचंद यावलकर यांनी भूषविले.या प्रसंगी जिल्हा न्यायाधीश-१तथा अतिरिक्त सत्र न्यायाधीश माननीय श्री.सुधीर बाबूराव भाजीपाले आणि केज वकील संघाचे अध्यक्ष अ‍ॅड. महादेव संपतराव लाड यांनी कार्यक्रमाचे उत्कृष्ट नियोजन केले. कार्यक्रमाच्या सुरुवातीला मान्यवरांचे औक्षण करून त्यांना फेटे बांधण्यात आले. ऊसतोड कामगार संचलित श्री साने गुरुजी निवासी विद्यालय,केज यांच्या विद्यार्थ्यांनी स्वागत गीत सादर करून उपस्थितांचे मन जिंकले. त्यानंतर मान्यवरांचा शाल,श्रीफळ,रोपटे व भेटवस्तू देऊन सत्कार करण्यात आला.

यावेळी अ‍ॅड.महादेव लाड यांनी मनोगत व्यक्त करत बांधकामाचा आढावा घेतला.अध्यक्षीय भाषणात न्यायाधीश श्री. आनंद यावलकर यांनी न्यायालयीन सुविधांच्या वाढीमुळे पक्षकार व वकिलांची मोठी सोय होणार असल्याचे सांगितले. प्रमुख पाहुणे श्री.संभाजीराव शिंदे यांनी न्यायव्यवस्थेत मध्यस्थी (मेडिएशन) पद्धतीचा अधिक वापर करण्याची गरज व्यक्त केली.तसेच ‘राईट टू एज्युकेशन’ व आरोग्य या विषयांवरही त्यांनी विशेष भर दिला.

न्यायमूर्ती श्री.सिद्धेश्वर ठोंबरे यांनी आपल्या कारकिर्दीचा प्रवास मांडत केज तालुक्याशी असलेले भावनिक नाते व्यक्त केले.न्यायमूर्ती श्री. अभय मंत्री यांनीही आपले विचार मांडले.

कार्यक्रमाचे आभार प्रदर्शन न्यायाधीश श्री. सुधीर भाजीपाले यांनी केले.समारंभानंतर उपस्थितांनी स्नेह भोजनाचा आस्वाद घेत कार्यक्रमाची सांगता करण्यात आली.नवीन मजल्याच्या उभारणीमुळे केज परिसरातील न्यायालयीन कामकाज अधिक सुलभ होऊन नागरिकांना न्याय प्रक्रियेत मोठा दिलासा मिळणार असल्याचे यावेळी व्यक्त करण्यात आले.