नानाजी देशमुख कृषी संजीवनी प्रकल्प पोर्टल ठप्प ; भूमिहीनांच्या नोंदणीसाठी तातडीने सुरू करण्याची मागणी– पांडुरंग कसबे 

केज/प्रतिनिधी

महाराष्ट्र राज्यासह मराठवाड्यातील शेतकरी व भूमिहीनकुटुंबीयांसाठी महत्त्वाचा ठरणारा नानाजी देशमुख कृषी संजीवनी प्रकल्प (POCRA)सध्या तांत्रिक अडचणीमुळे चर्चेत आला आहे.या प्रकल्पा अंतर्गत विविध योजनांचा लाभ घेण्यासाठी आवश्यक असलेली भूमिहीन कुटुंबातील व्यक्तींची ऑनलाइन नोंदणी काही दिवसां पासून बंद असल्याने लाभार्थ्यांमध्ये नाराजीचे वातावरण निर्माण झाले आहे.

याच पार्श्वभूमीवर शेतकरी जनहित कामगार मंच,महाराष्ट्र राज्याचे प्रदेशाध्यक्ष पांडुरंग कसबे यांनी शासनाकडे तीव्र शब्दांत भूमिका मांडत,संबंधित पोर्टल तातडीने सुरू करण्याची मागणी केली आहे.कसबे यांनी दिलेल्या माहितीनुसार,सध्या राज्य शासनाकडून शेतकरी तसेच भूमिहीन कुटुंबीयांसाठी विविध योजना राबविण्यात येत आहेत.

विशेषतः POCRAअंतर्गत जल संधारण,शेती सुधारणा, पशुपालन,रोजगार निर्मिती अशा अनेक घटकांवर आधारित योजना उपलब्ध आहेत. मात्र,या योजनांचा लाभ घेण्यासाठी आवश्यक असलेली नोंदणी प्रक्रिया बंद असल्याने पात्र लाभार्थ्यांना अर्ज करता येत नाही.सदर वेबसाईट वर “तांत्रिक कारणामुळे भूमिहीन कुटुंबांचीनोंदणी तात्पुरती बंद आहे” असा संदेश दिसत असल्यामुळे अनेक नागरिक संभ्रमात आहेत. मराठवाड्यातील बीड,उस्मानाबाद,लातूर, नांदेड यांसारख्या जिल्ह्यांमधील अनेक गावे या प्रकल्पात समाविष्ट असून,येथील शेतकरी व मजूर अर्जासाठी प्रयत्न करत आहेत.परंतु,पोर्टल बंद असल्याने त्यांना वारंवार अडथळे येत आहेत.

यामुळे केवळ अर्ज प्रक्रिया थांबलेली नाही, तर अनेक लाभधारक योजनांपासून वंचित राहण्याची शक्यता निर्माण झाली आहे. विशेषतः भूमिहीन कुटुंबीय,शेतमजूर व कष्टकरी वर्गासाठी ही परिस्थिती गंभीर मानली जात आहे.कारण,या घटकांसाठी उपलब्ध असलेली अनुदानित योजना त्यांच्या उत्पन्न वाढीचा व स्थैर्याचा महत्त्वाचा आधार ठरते.

पांडुरंग कसबे यांनी यावर प्रतिक्रिया देताना सांगितले की,तांत्रिक अडचणीमुळे काही काळ सेवा बंद राहू शकते,परंतु ती लवकरात लवकर सुरळीत करणे ही शासनाची जबाबदारी आहे.अन्यथा हजारो पात्र लाभार्थ्यांवर अन्याय होईल.त्यांनी पुढे असेही नमूद केले की,जर ही समस्या तातडीने सोडवली नाही,तर शेतकरी व कामगारांच्या वतीने तीव्र आंदोलन छेडले जाईल.दरम्यान, स्थानिक पातळीवर देखील नागरिकांनी प्रशासनाकडे तक्रारी मांडण्यास सुरुवात केली आहे.अनेक जणांनी ऑनलाइन सुविधा पुन्हा सुरू होईपर्यंत अर्ज स्वीकारण्यासाठी पर्यायी व्यवस्था करण्याची मागणी केली आहे.

एकूणच,नानाजी देशमुख कृषी संजीवनी प्रकल्प हा ग्रामीण भागाच्या विकासासाठी अत्यंत महत्त्वाचा असून,त्याची अंमलबजावणी सुरळीत होणे आवश्यक आहे. तांत्रिक अडचणींचा परिणाम थेट गरीब व गरजू घटकांवर होत असल्याने शासनाने याकडे गांभीर्याने लक्ष देणे गरजेचे आहे.आता शासन यावर कितपत तत्परतेने कारवाई करते आणि बंद असलेली नोंदणी प्रक्रिया पुन्हा कधी सुरू होते,याकडे सर्वांचे लक्ष लागले आहे.