येवता येथे श्रमदान करत साजरा झाला जागतिक महिला दिन ; सखी सुखी उपक्रमाचा पुढाकार
केज/प्रतिनिधी
केज तालुक्यातील येवता येथे जागतिक महिला दिनाचे औचित्य साधून नवचेतना सर्वांगीण विकास केंद्र,केज अंतर्गत चालवल्या जाणाऱ्या ‘सखी सुखी’ प्रोग्रामच्या वतीने अनोख्या पद्धतीने महिला दिन साजरा करण्यात आला.केवळ भाषणे न करता,गावात श्रमदान करून सखींनी सामाजिक बांधिलकी जपली.गावात श्रमदान आणि स्वच्छता मोहीम
कार्यक्रमाची सुरुवात सखी सुखीग्रुपच्या लीडर रजनी गायकवाड,आशा जोगदंड आणि अनुसया सोनवणे यांच्या मार्गदर्शनाखाली करण्यात आली.महिला दिनानिमित्त या सखींनी एकत्र येत गावातील परिसरात श्रमदान केले. “स्वच्छता हीच सेवा” हा संदेश देत महिलांनी गावात प्रत्यक्ष काम करून महिला शक्तीचा परिचय करून दिला.
महिलांचा सत्कार आणि मार्गदर्शन श्रमदानानंतर आयोजित मुख्य कार्यक्रमात गावातील कर्तृत्ववान महिलांचा सत्कार करण्यात आला. यावेळी रजनी गायकवाड यांनी उपस्थितांना मार्गदर्शन केले.त्यांनी ‘सखी सुखी’ ग्रुपच्या उद्दिष्टांवर प्रकाश टाकला महिलांचे आरोग्य,त्यांचे आर्थिक स्वावलंबन आणि कौटुंबिक सुख या गोष्टी कशा साध्य करता येतील,यावर त्यांनी सविस्तर चर्चा केली.
महिलांची मोठी उपस्थिती
या कार्यक्रमात समाजा तील विविध स्तरांतील महिलांनी सहभाग नोंदवला.यामध्ये प्रामुख्याने अंगणवाडी सेविका व मदतनीस,आशा वर्कर,एकल महिला संघटनेच्या पदाधिकारी रत्नमाला गायकवाड व सुरेखा गायकवाड व गावातील इतर महिलांनीही या उपक्रमात मोठ्या उत्साहाने सहभाग घेतला होता.महिलांच्या एकजुटीमुळे आणि त्यांच्या सामाजिक कार्यामुळे हा कार्यक्रम तालुक्यात चर्चेचा विषय ठरला आहे.महिलांनी केवळ घरात न थांबता समाजाच्या विकासातही वाटा उचलला पाहिजे. श्रमदानाच्या माध्यमातून आम्ही हाच संदेश देण्याचा प्रयत्न केला आहे.
– रजनी गायकवाड (लीडर,सखी सुखी प्रोग्राम)
