केज/प्रतिनिधी
तहसीलदार केज यांना झोपडपट्टी हक्क संघर्ष समितीच्या वतीने निवेदन सादर करण्यात आले.या निवेदनामध्ये क्रांतीनगर, कानडी रोड येथे १९८३- १९८४ पासून शासनाने ९१ व ९५ असे १८६ घरे निराधार ,भूमिहीन, बेघर, अनुसूचित जाती जमाती,भटक्या विमुक्त जाती जमाती, अल्पसंख्यांक लोकांना एक गुंठा जागा व पाच पत्रांचे घरकुल बांधून वाटप करून कबाली पत्रक म्हणजेच मालकी हक्क दिलेली होती, परंतु गेल्या ४० वर्षात कुटुंबातील संख्या वाढल्याने क्रांतीनगर वसाहतीत पाचशे ते सहाशे घरे झालेले आहेत.तरी कुटुंब संख्या वाढल्याने दीड ते दोन गुंठे जागा देऊन मालकी हक्क देण्यात यावा तसेच सर्व नागरीसुविधा या झोपडपट्टी धारकांना देण्यात याव्यात यासाठी सदरील निवेदन सादर करण्यात आले.
क्रांतीनगर येथील विठ्ठल मंदिर,महात्मा फुले सभागृह, सत्यशोधकअण्णाभाऊ साठे सभागृह, अंगणवाडी,जिल्हा परिषद प्राथमिक शाळा ,तसेच डॉ. बाबासाहेब आंबेडकर सभागृह यांची जागा मोजून नगरपंचायत केज अभिलेखात नोंद करण्यात यावी.
वरील सर्व सभागृह,शाळा व अंगणवाडी यांची त्वरित दुरुस्ती करण्यात यावी. यश कंट्रक्शन कंपनीने अपूर्ण ठेवलेले काम तात्काळ करण्यात यावे क्रांतीनगर वसाहतीत जुने रस्ते व नाल्या तत्काळ दुरुस्तकरण्यात याव्यात,तसेच मुस्लिम समुदायाकरिता कब्रस्तानासाठी जागा देण्यात यावी,नवीन पाईपलाईन टाकून पिण्याच्या पाण्याची सोय करावी.
वसंत महाविद्यालयासमोर सीसीटीव्ही बसवण्यात यावा,रमाई घरकुल योजना,पंतप्रधान आवास योजना या घरकुला योजनेतील पहिला व दुसरा हप्ता तात्काळ देण्यात यावा, अपंग,संजय गांधी निराधार योजना, श्रावण बाळ योजना नागरिकांची केवायसी होत नसल्याने पर्यायी व्यवस्था करून बंद झालेल्या पगारी पुन्हा सुरू करण्यात याव्यात. तसेच क्रांतीनगर येथे मंजूर असलेले स्वस्त धान्य दुकान क्रांतीनगर भागातच सुरू करण्यात यावे.
याकरिता जिल्हाधिकारी साहेब, उपजिल्हाधिकारी साहेब,तहसीलदार साहेब तहसीलदार केज तसेच मुख्याधिकारी साहेब नगरपंचायत कार्यालय केज,पोलीस निरीक्षक साहेब पोलीस ठाणे केज यांना माहितीस्तव सादर करण्यात आले.सदरील निवेदनावर बाबुराव गालफाडे सर, लक्ष्मण जाधव ,इरफान पठाण, अनिल लोखंडे,महादेव लांडगे, शितलताई लांडगे ,योगेश गायकवाड, अजय गालफाडे, आरेफ खुरेशी ,नागेश जावळे, भीमा हजारे इत्यादींच्या स्वाक्षऱ्या आहेत.
