मातंग समाजाच्या स्वतंत्र आरक्षणासाठी १२डिसेंबर रोजी नागपूर येथे धडक मोर्चा,हिवाळी अधिवेशनात जनसागर उसळणार
केज/प्रतिनिधी
मातंग समाजाला स्वतंत्र आरक्षण मिळावे,तसेच अनुसूचितजाती आरक्षणा मधील अ.ब.क.ड क्रमवारीची अंमलबजावणी तातडीने करावी,या दोन प्रमुख मागण्यांसाठी राज्यभरा तील मातंग समाज आगामी १२ डिसेंबर रोजी नागपूर येथे भव्य ‘धडक मोर्चा’ काढणार आहे. हिवाळी अधिवेशनाच्या पहिल्याच आठवड्यात होणारा हा मोर्चा समाजाच्या आवाजाला नवा वेग देणारा ठरणार असून, सरकार समोर मोठे आव्हान निर्माणकरण्याची शक्यता वर्तवली जात आहे.
सर्वोच्च न्यायालयाने आरक्षणातील उपविभाजन आणि क्रमवारीसंदर्भात दिलेल्या निर्देशानंतर मातंग समाजात मोठ्या प्रमाणावर नाराजी व्यक्त होत आहे.स्वतंत्र आरक्षण न मिळाल्याने समाजाच्या प्रगतीला अडथळानिर्माण झाला असल्याचे विविध संघटनांचे मत असून, अनेक दशकांपासून चालत आलेल्या न्यायाच्या मागणीसाठी हा मोर्चा निर्णायक होईल,असा विश्वास समाजात व्यक्त केला जात आहे.
मोर्चाच्या तयारीचा आढावा घेण्यासाठी बीडमध्ये नुकतीच विशेष बैठक आयोजित करण्यात आली.बैठकीमध्ये समाजातील ज्येष्ठ नेते, महिला प्रतिनिधी,युवा कार्यकर्ते मोठ्या संख्येने उपस्थित राहिले होते. फोटोंमधून दिसणाऱ्या या बैठकीत समाजातील विविध घटक एकाच ध्येयाने एकत्र आलेले पाहायला मिळाले.या बैठकीत गावागावांत मोर्चासाठी जनजागृती मोहीम राबवण्याचा निर्णय घेण्यात आला. काही संघटनांनी निधी संकलन उपक्रम सुरू करण्याची जबाबदारीही स्वीकारली आहे.
सोशल मीडिया तसेच प्रत्यक्ष भेटीद्वारे मोर्चाच्या संदेशाचा प्रसार सुरू आहे.लहुजी शक्ती सेनेचे जिल्हा कार्याध्यक्ष सचिन गालफाडे यांचे सदरील मोर्चाला मोठ्या संख्येने उपस्थित राहण्याचे आवाहन करण्यात आले आहे.त्यांनी मातंग समाज बांधवांना उद्देशून महत्त्वपूर्ण आणि प्रेरणादायी संदेश दिला. त्यांनी सांगितले की, मातंग समाजाच्या हक्काचा हा लढा ऐतिहासिक आहे.प्रत्येक समाज बांधवाने १२ डिसेंबरला नागपूर येथे उपस्थित राहून आपली एकजूट सरकारपुढे दाखवण्याची ही वेळ आहे.हजारोंच्या संख्येने उपस्थित राहून आपण स्वाभिमान आणि न्याया साठी लढत आहोत हे जगाला दाखवू या असे त्यांनी सांगितले आहे.
त्यांच्या आवाहनानंतर उपस्थितांमध्ये उत्साह उसळला असून बीड जिल्ह्यातून मोठ्या प्रमाणात समाजबांधव नागपूरकडे रवाना होण्याची तयारी सुरू आहे.मराठवाडा, विदर्भ, कोकण, पश्चिम महाराष्ट्र या सर्व भागांतून संघटनांनी मोर्चासाठी शेकडो बस, खासगी वाहनांची व्यवस्था करण्यास सुरुवात केली आहे. अनेक गावांमध्ये युवकांनी मोर्चासाठी स्वयंसेवक पथके तयार केली आहेत. महिलांचाही मोठा सहभाग अपेक्षित आहे.
मोर्चाचे नियोजन सुयोग्य राहावे म्हणून विविध संघटनांच्या समन्वय समित्या स्थापन करण्यात आल्या आहेत. प्रत्येक जिल्ह्यातील प्रमुख पदाधिकारी समाजबांधवांना मार्गदर्शन करत आहेत.आरक्षणाच्या प्रश्नावर आता शासनाने ठोस भूमिका घ्यावी, अशी एकमुखी मागणी समाजातून होत आहे.समाजाची शिक्षण, नोकरी, राजकीय प्रतिनिधित्व यांसह सर्व क्षेत्रातील प्रगती स्वतंत्र आरक्षणाशिवाय शक्य नाही, असा ठाम निर्धार व्यक्त होत आहे.
१२ डिसेंबरचा नागपूर मोर्चा हा मातंग समाजाच्या संघर्षाच्या इतिहासातील सर्वाधिक व्यापक आणि संघटित आंदोलन ठरणार असल्याचे सामाजिक क्षेत्रात बोलले जात आहे. हिवाळी अधिवेशनात आधीच विविध प्रश्नांसाठी राज्य सरकारवर दबाव असताना मातंग समाजाचा हजारोंचा जनसागर नागपूरला दाखल होणार हे निश्चित झाले आहे. त्यामुळे शासनाने आरक्षणासंदर्भात स्पष्ट भूमिका घेतली नाही तर पुढील काळात आणखी तीव्र आंदोलनाच्या शक्यतेकडेही जाणकार लक्ष वेधत आहेत.
